Paz Mesa naz na pasión d’esfrutar y caltener un oficiu con sieglos d’historia y tradición.
Tamién naz de la molición de mantener esa conocencia y saber, qu’a pesar del pasu de los sieglos sigue conservando la so razón de ser, reellaborando la tradición con diseños, téuniques y funcionalidaes contemporáneos. Un oficiu que paga la pena protexer y que constituye un patrimoniu históricu de toos.
Paz Mesa trata de promover y esparder formes de consumo más responsables, da prioridá a la llana asturiano y otres llanes llocales y/o de producción orgánico, lo qu’incide direutamente nel territoriu en términos económicos, culturales, mediuambientales y sociales.
Un proyeutu de vida
Depués de más de 10 años formándome en distintes disciplines d’artesanía testil, decidí abandonar el mio trabayu de funcionaria na alministración pa dedicame a la texeduría tradicional en telar. Esto forma parte de la mio manera d’entender la vida, que pasa por vivir al par de la naturaleza de la que formamos parte, ya implica desempeñar l’oficiu de forma que minimice la mio buelga ecolóxica, teniendo en cuenta a les persones, el mediu ambiente y el bienestar animal.
Nel corazón rural d’Asturies
Tou ello dientro d’un territoriu enllenu d’historia y cultura que conforma’l paisaxe del mio proyeutu.
El taller atópase na aldea asturiana de Puerma (Les Regueres), nun conxuntu etnográficu integráu pola vivienda-taller y tres horros, que fueron treslladaos, recuperaos y rehabilitaos poles nueses manes.
Ún d’ellos del sieglu XVI, con policromíes que me llevaron un trabayu bien abegosu de restauración reconocíu col premiu “Lliñu” na so primer convocatoria nel añu 2022.
Producción responsable
Defendo que la creación de testiles tien de tar venceyada non solo col procesu d’ellaboración y la rentabilidá, sinón qu’amás tien de tener en cuenta un compromisu éticu.
Conceutos como territorialidá, salú, bienestar animal, sostenibilidá, ecoloxía, mediuambiente, socioloxía, cultura, sustentabilidá y trazabilidá son elementos imprescindibles d’esti proyeutu.
Defendo un consumu consciente que garantice unes condiciones llaborales dignes y que minimice l’impautu nel mediuambiente y la salú. Esto trai una implicación personal nuna producción lenta y sostenible de pieces atemporales y de llarga duración, en contraposición a la superproducción de la industria testil qu’abandera una moda cambiante en cada temporada.
