En 2025 tuvi l’honor de quedar finalista nos Premios Nacionales d’Artesanía, na categoría d’Emprendimientu, una reconocencia que pon en valor el proyectu que desenvuelvo dende pazmesa.art. Estos premios estremen cada añu a persones y talleres qu’apuesten por una artesanía de calidá, innovadora y comprometida cola so redolada.
Qué significa esta reconocencia
Tar ente los proyectos finalistes na categoría d’Emprendimientu supón un gran impulsu pa un taller testil rural como’l míu, que crez pasu a pasu, dende un pequenu pueblu y con recursos llindaos. Esta reconocencia refuerza la idea de que tamién dende lo local y lo artesanal pueden construyise iniciatives sólides, contemporanees y con proyeición.
Finalista nos Premios Nacionales d’Artesanía 2025 na categoría d’Emprendimientu: un impulsu para siguir texendo futuru dende’l mediu rural
Un taller testil rural con llanes locales
Dende pazmesa.art trabayo con llanes locales, especialmente d’oveya xalda, y con tintes naturales, texendo en telar pieces úniques que nacen del paisaxe y de la memoria del territoriu. Cada bufanda, chal o cobertor ellabórase a poco fueu, curiando’l bienestar animal, l’impactu ambiental y la relación cola comunidá rural que caltién esti oficiu.
Entamar dende’l mediu rural
Presentar esti proyectu a los Premios Nacionales d’Artesanía na categoría de Emprendimientu foi tamién una forma de visibilizar qu’entamar dende’l mediu rural ye posible y necesariu. L’artesanía xenera empléu de proximidá, fixa población nos pueblos y ufierta alternatives de consumu más conscientes y venceyaes al territoriu.
Un pasu más nel camín
Ser finalista na edición de 2025 nun ye un puntu de llegada, sinón un pasu más nel camín de siguir investigando, texendo, esperimentando con colores, formes y formatos p’averar la llana y la creación testil a más persones. Ye tamién una invitación a siguir defendiendo l’artesanía como una forma d’innovación guañada na tierra, que conecta tradición, sostenibilidá y futuru.
Toles fotografíes son de Pablo Morquecho (Rod&Cone) y fueron cedíes por EOI-Fundesarte
