El pasáu vienres 9 de mayu tuvi l’honor de recibir el Premiu Verdes Valles Asturianos de la Fundación Marino Gutiérrez Suárez, una reconocencia que m’emociona fondamente y que quiero compartir con toles persones que creen, como yo, nel potencial tresformador de l’artesanía.
Un premiu qu’apuesta pola artesanía n’Asturies
Esti premiu fíxome cavilgar sobre’l camín percorríu, sobre cómo la pandemia emburrióme a dar un xiru vital y a dedicame dafechu a lo qu’hasta entós fuera una actividá complementaria: el trabayu cola llana, los texíos y los tintes.
El trabayu cola llana, los texíosy los tintes dexó de ser una actividá complementaria pa convertise nuna vocación
¿Qué tien esti oficiu que tantu nos atrapa? Creo que zarra un conxuntu de saberes y práctiques culturales fondamente humanos. Saberes que precisamos recuperar, desenvolver y compartir si aspiramos a una sociedá más xusta y sostenible.
Recibir esti premiu nun ye namás un honor personal. Ye tamién un respaldu claru a l’artesanía n’Asturies
Recibir esti premiu nun ye solo un honor personal. Ye tamién un respaldu claru a l’artesanía n’Asturies. A una forma de vida que curia lo local, lo fecho a mano, lo respetuoso cola tierra y coles persones. Una manera de crear qu’incorpora la hestoria, la identidá y la sensibilidá del nuesu territoriu.
La oveya xalda, la nuesa raza autóctona, humilde y resistente, vuelve tener valor como símbolu d’un patrimoniu que nun queremos perder
Mención especial merez la oveya xalda, la nuesa raza autóctona, humilde y resistente. Mientres más de 3000 años apurriónos abrigu, sustentu y cultura. La so llana, tantes vegaes ignorada, güei vuelve tener valor como símbolu d’un patrimoniu que nun queremos perder. En cada febra que trabayu pongo un cachu de memoria, de cultura y d’una forma de tar nel mundu que merez siguir viva.
Esti premiu ye una lluz que se proyecta non solo sobro mi, sinón tamién sobro tantes persones que caltienen oficios coles sos manos y el so corazón
L’artesanía precisa sofitu, sí, pero sobremanera precisa ser vista, valorada y entendida. Esti premiu ye una lluz que se proxecta non solu sobre mi, sinón tamién sobre tantes persones que, coles sos manos y el so corazón, caltienen oficios que formen parte de la nuesa cultura común.
Gracies, de corazón, por creer en tou esto. Gracies a la Fundación Marino Gutiérrez Suárez por contribuyir a que l’artesanía siga viva y con futuru n’Asturies.
