Esti taller de dos díes propón un percorríu completu pol trabayu testil de la llana, dende’l momentu posterior a la esquila hasta’l so tresformamientu en filo y texíu. Vamos deprender a escoyer el vellón, llavar la llana, escarmenar, cardar y filar en fusu y tornu de filar, y vamos averanos tamién al procesu de teñío y al texío en telar.
L’actividá va desendolcase en Puerma, una aldea a 20 minutos d’Uviéu, nuna redolada rural única, debaxo d’un horru del sieglu XVI, nun conxuntu etnográficu enllenu d’hestoria. Ellí vamos conocer de cerca l’oficiu, la hestoria del llugar y el venceyu ente paisaxe, memoria y oficiu.
Vamos empecipiar el taller visitando’l fatáu d’oveya xalda, raza autóctona asturiana en peligru d’estinción, vamos compartir un momentu de gastronomía tradicional pa vivir la esperiencia dende una mirada completa: trabayu, territoriu y cultura.
El sábadu vamos realizar tol procesu de la llana: escoyida del vellón, llaváo, escarmenao, cardao, filao con fusu y filadora y plegao de filos.
El domingu vamos deprender los principios básicos de texeduría en telar con un telar de lligues, nel que vamos texer una lliga cola llana filada’l sábadu. Y pa rematar, na tarde del domingu vamos tener una introducción a la tintorería natural, con dos materies tintóries, y delles fibres testiles: llana, seda, llinu y algodón.
El taller ta pensáu como una inmersión na conocencia de la llana, con una atención especial a los procesos manuales, a la so importancia histórica, situación actual y a la tresmisión d’una conocencia viva.
Con esti taller vas deprender a crear los tos propios filos.
Nun fai falta tener conocencies previes: l’acompañamientu ye individualizáu y el ritmu adáptase a cada participante.
El taller tien una duración de 14 hores.
Cada participante va filar el so propiu filo col que va texer xuna lliga, y va realizar un mostrariu colos distintos tintes y fibres testiles.
Fecha: sábadu 16 de mayu de 10:00 a 14:00 y de 15:30 a 19:30 hores y, domingu 17 de mayu de 10:00 a 14:00 y de 15:30 a 18:00 hores.
Places llindaes.
Inclúi tolos materiales necesarios.
Pa formalizar la inscripción ye necesariu realizar el pagu del taller en conceutu de reserva. La reserva nun ye reembolsable, sacantes l’avisu de la non asistencia al cursu a realizar con más d’una selmana d’antelación y atopemos a otra persona qu’ocupe la to plaza.
Puedes mercar el taller pa ti o pa quien quieras.
Suscríbite pa tar al día de la nuesa axenda d’actividaes.
Contacta con nós pa cualesquier dulda que tengas.
