El pasáu mes d’agostu recibí’l Premiu Urogallo del Centru Asturianu de Madrid na categoría d’Artesanía. Esti galardón, que s’apurre tradicionalmente na Feria Internacional de Muestras de Asturies (FIDMA) en Xixón, reconoz cada añu a persones y colectivos que contribúin a espublizar y curiar la cultura asturiana en distintos ámbitos.
Un reconocimientu con historia
Los Premios Urogallo concédense dende 1986 y tomen categoríes como artesanía, baille, tonada, corales, gaita y otres manifestaciones culturales amestaes a la identidá asturiana. Formar parte d’esta llista, al llau d’asociaciones, artistes y proyectos que tantu almiro, ye un honor difícil de poner en pallabres.
El Premiu Urogallo reconoz el mio trabayu na artesanía testil sostenible y l’espardimientu de la cultura asturiana
Texer dende’l territoriu
Nel mio casu, el Centru Asturianu de Madrid quixo reconocer con esti premiu’l trabayu que desenvuelvo dende Pazmesa.art: un taller testil rural onde texo pieces en telar con llanes locales, especialmente d’oveya xalda, y con tintes naturales, venceyando cada texíu al paisaxe y a la memoria del territoriu. Cada bufanda, chal o cobertor naz d’un procesu lento y respetuoso colos animales, el mediu ambiente y la comunidá rural que sostien esti oficiu.
Una emoción compartida
Recibir el Urogallo en plena FIDMA, arrodiada de tantes persones qu’amen Asturies dientro y fora del país, foi fondamente emocionante. Sentí que la reconocencia diba más allá del mio nome: yera tamién pa les muyeres artesanes del mediu rural, pa quien curien fataos, filen hestories y caltienen vivos los oficios testiles tradicionales.
Artesanía ya innovación dende la tierra
Esti premiu llega nun momentu nel que l’artesanía precisa ser entendida como una forma d’innovación enraigonada na tierra: xenera empléu de proximidá, fixa población nos pueblos y ufierta alternatives de consumu más conscientes. Poro, el Urogallo ye tamién un impulsu pa siguir investigando, texendo, esperimentando con colores y formes, y compartiendo el valor de la llana y de la creación testil dende Asturies.
Gracies por acompañar esti camín
Quiero agradecer al Centru Asturianu de Madrid esta reconocencia, y a toles persones qu’acompañáis el proyectu mercando una pieza, viniendo a un taller o encamentando’l mio trabayu. Gracies a vós, esti pequenu taller rural conviértese, adulces, nun llugar onde l’artesanía y la cultura asturiana dialoguen col presente.
