Cuando’l cocineru Pedro Martino propúnxome collaborar na presentación d’unu de los sos platos, la so versión contemporánea de la casadiella, supi que yera una oportunidá única para tender una ponte ente l’artesanía testil y la gastronomía d’autor. Na so cocina, como na artesanía, hai un fondu respetu pol orixe, pol procesu, pola materia prima y pola hestoria que cada creación conlleva.
Pa esti proyectu diseñé y ellaboré tapetes artesanales utilizando dos fibres que formen parte de la historia testil d’Asturies: la llana d’oveya xalda y el llinu. Esta combinación nun ye nueva: históricamente utilizóse nos texíos destinaos a la indumentaria tradicional, xuniendo les propiedaes térmiques y resistentes de la llana cola frescura y llixereza del llinu. Xuntes, estes fibres cunten xuna hestoria de saber facer, d’adaptación a la redolada y de vida cotidiana na nuesa tierra.
Los tapetes nun yeren solo una base decorativa pa la casadiella reinventada de Martino: yeren una estensión del relatu, una forma de presentar el platu sobro un llenzu enllenu de significáu
La llana xaldo, cálida, rústica y resistente, apurrió testura y fondura al texíu. El llinu, cola so elegancia natural y la so suavidá al tactu, dio’l contrapuntu perfectu, creando un equilibriu ente fuerza y sotileza. Los tapetes nun yeren solo una base decorativa pa la casadiella reinventada de Martino: yeren xuna estensión del relatu, una forma de presentar el platu sobro un llenzu enllenu de significáu.
Esta collaboración recordóme una vegada más cómo l’artesanía puede dialogar con otros llinguaxes creativos, cómo pue tar presente nuna mesa, nun xestu, nun bocáu. Ver cómo Pedro integró estes pieces na so puesta n’escena foi emocionante: una sinerxa ente cocina y texíu, ente anovación y memoria.
Gracies, Pedro, por confiar nel mio trabayu y por dar visibilidá a lo fecho a mano, a lo llocal, a lo que ñaz d’un oficiu con raigaños.
